Puisi Bugis - Telluka Anu Pura - Teppinra Assituruseng

TELLUKA ANU PURA – TEPPINRA ASSITURUSENG

Oleh : Drs. Asmat Riady Lamallongeng

Masero lebbik garék ripogauk

Makkutanaé ri madécéngngé

Pateppai éngngi pangilé

Gauk sitinajaé

Tangngai gaukmu naiyya muala anré guru

Alai madécéngngé mutettangngi majak é

Nasabak iyya garék nawa nawaé

Sionrong temmassarang toi

Décénna nenniya jakna

Tellu sirik masero décéng ri posirik

Sirik é ri dé’wata séuwwaé

Sirik é ri watakkalé

Nenniya sirik é ripadatta jémma

Telluto pappésangka watakkalé

Paompok décéng ri linoé

Pésangkai aléta maggauk majak

Makkeda ada teppatuju

Nenniya mannawa nawa masala

Paddioloiwi nawa nawa madécéng

Ritemmaddupana – ritemmannessana

Sininna gauk riangujuiyé

Muabbéréangngi ati macinnommu

Nawalekko décéng padammu jémma

Makkedai To Ciung Maccaé ri Luwu

Naiyya tanranna gettengngé

Tessalai janci – tessorosi ulu ada

Telluka anu pura – teppinra assituruseng

Patabbakani siya sompek édé

Naritajeng anging masagalaé

Topada maddolangeng

Ri tasikna pésonaé

Topada salamak lempuk

Rattéi soréang ménasaé

Watampone, 12 Januari 2013

Dibacakan untuk pertama kalinya oleh Andi Dahliana Bahri, S.Pd pada Debat Kandidat Cabup dan Cawabup Bone  pada tanggal 12 Januari 2013 di Gedung Lestari Watampone.

Like This Article ?

Anda baru saja membaca artikel yang berkategori Asmat Riady Lamallongeng / Puisi dengan judul "Puisi Bugis - Telluka Anu Pura - Teppinra Assituruseng". Anda bisa bookmark halaman ini dengan URL https://luyokita.blogspot.com/2014/08/puisi-bugis-telluka-anu-pura-teppinra.html?m=0.